Evacúan unha muller de 81 anos tras caer dun muro de dous metros durante unha romaría en Rebordelo
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Unha muller de 81 anos tivo que ser evacuada polo 061 tras precipitarse dun muro de case dous metros de altura durante a romaría de Rebordelo, en Ponte Caldelas.
O suceso tivo lugar cando os presentes esperaban a saída da procesión ao final da misa solemne en honra á Virxe da Saúde.
A muller, veciña de Marín, caeu nese momento muro abaixo por causas que se descoñecen.
Efectivos de Protección Civil de Vilaboa, que coordinaban o dispositivo de tráfico e seguridade, auxiliaron á muller ferida xunto a varios dos alí presentes. Entre eles atopábase tamén o alcalde de Ponte Caldelas, Andrés Díaz, que foi o encargado de chamar ao servizo de emerxencias 112 para que enviasen unha ambulancia.
O sucedido, unido á intensa choiva, provocaron a suspensión da procesión, aínda que a romaría continuou cun concerto da Banda de Música de Tenorio.