A xuízo en Pontevedra por tratar de queimar vivo a un fillo que evitaba que a súa nai fora violada
Por Redacción
Cada certo tempo chega á Audiencia de Pontevedra un deses xuízos que, con só ler o escrito de acusación, fai que se che xee o sangue. É o caso do que se xulgará o vindeiro xoves 7 de abril. O acusado é un pai que está acusado de tentar queimar vivo ao seu propio fillo cando este saíu en defensa da súa nai, á que o home estaba a pegar dunha forma brutal tras tentala violar previamente.
Así resume os feitos o escrito da Fiscalía que, en total, solicita á sección cuarta da Audiencia de Pontevedra que se lle condene a 17 anos e 11 meses de prisión polos delitos de agresión sexual, lesións, lesións en grao de tentativa, homicidio en grao de tentativa e atentado á autoridade.
Os feitos, que foron instruídos polos xulgados de Ponteareas, producíronse no domicilio familiar que compartían todos eles en Salvaterra do Miño sobre as sete da mañá do 27 de xuño de 2015.
O acusado, que segundo o fiscal estivera bebendo fóra de casa, atopouse coa súa muller no garaxe e "coa finalidade de satisfacer o seu desexo sexual", empuxouna e arrastrouna ata introducila na adega, onde tras suxeitala da garganta, deulle a volta, retorceulle o brazo e comezoulle a baixar os pantalóns, mentres ela resistíase e solicitaba auxilio ao seu fillo para que este, que era menor de idade, pedise axuda.
A agresión sexual non se consumou, relata o escrito de acusación, porque a muller logrou fuxir do seu marido e chegar ata o patio da vivenda. Foi alí cando este agarrouna polos pelos "tirándoa ao chan e dándolle patadas e labazadas".
O fillo da parella saíu da súa habitación alertado polos berros da súa nai, pedindo "insistentemente" ao seu pai que deixase de golpear á súa nai. Tras iso, perdeu o coñecemento. O seu pai regresou entón ao garaxe para coller un bidón de gasolina "para acabar coa vida do mesmo por auxiliar á súa nai".
Co bidón de gasolina na man, o home levou pola forza ao seu fillo de novo á habitación e tras pechar a porta asperxeu a cama de gasolina coa intención de queimalo vivo, afirmando, segundo o fiscal, que "choraches cando naciches, pero agora vas chorar máis".
Ante os berros dos veciños, o acusado abriu a porta da habitación, momento no que nai e fillo lograron escapar e refuxiarse en casa duns veciños, sendo perseguidos polo seu agresor cun coitelo na man e mentres lles arroxaba pedras e botellas de cristal.
Tamén tentou agredir aos axentes da Garda Civil que se acudiron alertados polos veciños e aos que tamén arroxou unha escopeta de aire comprimido que impactou contra o cristal do vehículo oficial, atrincheirándose na súa vivenda durante máis de tres horas.
Ademais de cárcere, a Fiscalía pide que se lle prohiba achegarse á súa esposa durante seis anos, a contar desde a súa saída de prisión, e ao seu fillo por oito anos. Tamén solicitarán ao tribunal que se lle prohíba a tenencia de armas durante outros tres anos.