Un abril cultural en Portonovo
Por Redacción
Portonovo contará con diversas actividades no mes de abril, comezando coa IX Palillada, seguido do I Campionato de Chave e finalizando co Festival de Baile.
Este domingo 3 de abril terá lugar a IX Palillada en Portonovo, que conta xa con 700 mulleres inscritas procedentes de diferentes puntos da xeografía española.
Segundo confirmou Rosa Alarcón, presidenta das Mulleres Rurais "asociacións de Xixón, Oviedo, Tarragona, Salamanca e das catro provincias galegas participarán neste evento", ademais Roberto Carlos Agís, edil de cultura, engadiu que "se trata dunha participación récord que converterá esta edición na máis concorrida dos últimos anos".
A carpa instalada será utilizada a próxima fin de semana, concretamente o sábado 9 de abril, polo Club de Piragüismo de Portonovo, para a celebración do I Campionato de Chave, que terá un custo de 30 euros de inscrición por equipo.
A data límite para apuntarse é o 4 de abril e contará con premios para os tres primeiros clasificados na categoría de Grupo, de 100, 75 e 50 euros, respectivamente, e un trofeo.
Na categoría individual haberá un trofeo para os tres xogadores que máis anotasen, e outro para o xogador que obteña máis puntos nunha soa tirada.
A última hora da tarde, a carpa contará coa actuación do cantautor Raúl, que ofrecerá un pequeno concerto, e con Hugo Andrade que imitará algunha famosa tonadilleira.
Por último, o domingo 10 celebrarase o XXII Festival de Baile Rexional e Gaita organizado por Os Gatiños de Portonovo. Ás 17:00 horas os grupos participantes realizarán un pasacalles pola localidade.
Cada grupo realizará dúas actuacións polo que a duración aproximada do Festival será dunhas tres horas.