Embarcacións de museo navegan pola ría de Pontevedra
Por Redacción
As primeiras unidades da clase 6mR que xa se atopan en Galicia -Ian, Galant, Caprice, Alí Baba e Aída- celebraron durante esta fin de semana o seu primeiro adestramento no Real Club Náutico de Sanxenxo. Neste primeiro encontro participaron destacados regatistas do panorama nacional e internacional, como Pedro Campos, acompañados, todos eles, polo rei emérito Juan Carlos I.
A clase 6mR, unha embarcación digna de museo, é moi popular nos países nórdicos. No mar Báltico existen moitos seguidores a esta fórmula, cun potente circuíto e calendario de competición onde hai activas asociacións de salvaguardia e promoción deste tipo de reliquias.
"Xa chegaron varios barcos e cinco deles estiveron navegando esta fin de semana" comentaba Pedro Campos, presidente do club pontevedrés, consciente de que por diante a frota aínda ten moito traballo encima da mesa e é que queda elaborar un regulamento que sirva como base para a creación dun circuíto nacional cuxa primeira proba disputarase o próximo mes de abril no Real Club Náutico de Sanxenxo: "Agora a idea que temos é tomar contacto con eles para despois decidir aspectos relevantes do circuíto como o calendario, a organización, o numero de barcos que terá a frota" Ir avanzando neste sentido" apostilaba o cuntiense 15 veces campión do mundo.
O Rei Juan Carlos puido probar diferentes unidades -como o "Ian" e o "Galant"- e tras estes adestramentos compartiu as súas impresións sobre a clase con regatistas de talla nacional e internacional como Pedro Campos, Alberto Viejo, Laureano Wizner, Ib Andersen o Mauricio Sánchez-Bella.
Segundo Pedro Campos, o grao de implicación do monarca neste proxecto débese a que "el quería volver navegar despois da experiencia do pasado outono e ademais este tipo de barcos, no que vas sentado e suxeito, favorécelle".
As tripulacións que se deron cita no club pontevedrés durante o sábado e o domingo puideron gozar dunhas condicións meteorolóxicas perfectas para a navegación e os adestramentos na ría de Pontevedra serviron para poder gozar dunha frota que, segundo Campos, é "un luxo, un patrimonio cultural polo que xa se interesaron armadores tanto de dentro como de fóra de España. Cada barco ten a súa personalidade, a súa historia, o seu deseño, son diferentes; e é asombrosa a tecnoloxía que xa tiñan nesta época. Son verdadeiras obras de arte".