Barro adxudica obras de mellora en varios viais
Por Redacción
Con cargo ao orzamento de 2016, a xunta de goberno local de Barro adxudicou o proxecto "Seguridade e melloras en viais municipais", por un importe de 22.908,87 euros.
No proceso de contratación solicitáronselle ofertas económicas a catro empresas do sector, das que resultou adxudicataria Trasmaxa Galicia, SLU, que ofertou unha mellora económica de 2.700,00 euros.
As obras inclúense dentro do Plan de Obras e Servizos da Deputación de Pontevedra (Plan Concellos 2016) e consisten na realización de dúas pontellas sobre o río en Valiñas, onde está cortada a circulación pois a auga foi desfacendo as existentes, o que representa un grande perigo.
Tamén se van reconstruir dous muros de contención de pistas municipais en Perdecanai.