Sanxenxo queda co obradoiro de hostalería do Grove
Por Redacción
Creada e actualizada
Creada e actualizada
Un local en réxime de aluguer situado no porto deportivo de Sanxenxo e cunha superficie de 500 metros cadrados é a localización proposta por Sanxenxo para acoller o Obradoiro de Hostalería da Mancomunidade do Salnés que no pleno celebrado na noite do xoves deu o visto e prace á tramitación da pertinente subvención á Consellería de Economía, Emprego e Industria.
O obradoiro está pensado para un total de 36 persoas e ofrecerá formación para camareiros de restaurante, de planta e cociñeiros entre outras profesións, e tería unha duración de sete meses, de setembro do 2016 a marzo de 2017.
O custo desta iniciativa formativa é de 352,581 euros, que terán que ser aprobados pola Consellería.
Un informe elaborado polo director da Escola de Hostalería, no que destaca as deficiencias das instalacións do Grove para acoller estes ciclos de formación tras a conversión en Pousadas, foi o que levou á Mancomunidade para buscar alternativas, decidíndose finalmente por Sanxenxo.
ENÉRXICA PROTESTA DO GROVE
Dende o Concello do Grove trasládase unha enérxica protesta por esta medida e reclámase que se teña en conta o investimento municipal realizado nas infraestruturas e materiais deste Obradoiro que deberá ser compensando antes de plantexar calquera traslado.
O Goberno do Grove condenou a "utilización partidista e interesada" da Mancomunidade do Salnés por parte do Partido Popular, polo traslado do Obradoiro de Hostalería da Lanzada ao Concello de Sanxenxo.
"Trátase dunha forma de seguir afogando a aqueles concellos que non son dirixidos polo grupo político que, a día de hoxe, segue presidindo a Mancomunidade tentando, ademais, condicionar o futuro da mesma", sinalaron dende o goberno local do Grove.
Nun comunicado sinalan que o presidente en funcións da Mancomunidade, Gonzalo Durán, "unha vez máis desvirtúa a utilidade dun organismo cuxo funcionamento debería estar marcado pola colaboración entre concellos e non polo enfrontamento entre eles".
O Grupo de Goberno do Grove di que a decisión "prima os intereses políticos particulares sobre as necesidades reais da cidadanía".
OBRADOIRO DE MUIÑOS
Este non é o único obradoiro no que participa Sanxenxo, senón que tamén está incluído no de Muiños. A Mancomunidade presentará á Consellería de Economía un proxecto, valorado en 435,850 euros, para a restauración de muíños en Meaño, Vilanova e Sanxenxo, concretamente en Dorrón e Bordóns.
Ofrecería tamén 36 prazas en materia de carpintería, cantería e medio ambiente e permitiría a posta en valor do patrimonio municipal.
Xunto á inclusión de Sanxenxo nestes dous obradoiros, a Mancomunidade delegou nos representantes deste municipio as delegacións de Turismo e Infraestruturas.