UGT e CCOO mobilizaranse o 8 de febreiro a prol do dereito de folga
Por Redacción
Os sindicatos Comisións Obreiras e UGT convocan mobilizacións en defensa do dereito de folga. Os actos reivindicativos terán lugar o día 8 en Pontevedra, coincidindo con outras protestas programadas en case toda Galicia.
A manifestación sairá ás 11:30 horas desde o edificio dos sindicatos na rúa Pasantería ata a Subdelegación do Goberno.
As organizacións convocantes salientan que a folga é un dereito fundamental recoñecido en case todos os países do mundo, "pero en España estase a restrinxir o seu exercicio para, ao tempo, silenciar á cidadanía", din nun comunicado.
"Preténdese converter o conflito social nun problema de orde pública, camiñando cara a un Estado de carácter policial", salientan.
As organizacións sindicais aseguran que xa se "criminalizaron" as actuacións de trescentos sindicalistas en defensa dos dereitos dos traballadores.
"Hai razóns de sobra para a mobilización" din dende Comisións Obreiras e UGT.
Din que a reforma do Código Penal e a lei de seguridade cidadá incorporan novas restricións ao exercicio de dereitos democráticos e liberdades civís e dan continuidade "á ofensiva contra o dereito de folga" que levou a axuizar traballadores así como representantes sindicais pola defensa colectiva dos dereitos laborais.