Tellados, fachadas e colectores, vítimas do primeiro temporal do ano
Por Diego Torrado
O temporal co que Pontevedra recibiu o ano 2016 deixou na capital un regueiro de incidencias, pero a práctica totalidade de escaso alcance. Tellados e fachadas de edificios que se desestabilizaron polo forte vento e colectores que saíron voando motivaron a intervención de dotacións dos Bombeiros e a Policía Local de Pontevedra, sendo a mañá o momento do día de maior actividade.
A Policía Local tivo á primeira hora varias chamadas por colectores movidos cercar e chapas que se desprenderon. No caso dos Bombeiros, a intervención máis destacada produciuse na rúa Alfonso X, na zona de Campolongo, onde unha casa abandonada perdeu a práctica totalidade do tellado.
A intervención rexistrouse sobre as 12.00 horas do mediodía. Os bombeiros recibiron unha chamada de alerta e acudiron á zona, atopándose con que varias tellas estaban en plena rúa tras desprenderse do tellado. Foi necesario que, con axuda dun guindastre, retirasen e asegurasen as que corrían perigo.
Pouco despois desprazáronse ata o barrio do Castañal, onde rexistraron dúas intervencións. A primeira produciuse na rúa Faustino Santalices, onde foi necesario que retirasen a uralita dun patio que estaba levantada e había perigo que caese. A continuación requiriuse a súa presenza na rúa Fraguas, neste caso para retirar as chapas dunha fachada que tamén podían chegar a caerse pola forza coa que azoutaba o vento.