O Grove súmase á explotación do 'carallo de mar' en Galicia
Por Redacción
A confraría de pescadores do Grove incorporará no ano 2016 un novo produto á súa oferta. Presentou un plan de explotación para que os seus barcos poidan extraer das augas galegas o 'carallo de mar', unha especie que está a espertar o interese do sector ante a boa saída comercial que está ter no mercado.
Segundo recolle este mércores o Diario Oficial de Galicia, a do Grove -xunto coa confraría da Coruña- sumarase o próximo ano á explotación deste equinodermo con forma de pepino que ten o nome científico de Holothuria forskali. Os pioneiros en extraer este produto do mar foron os barcos da confraría de Cangas, con destino principalmente á industria alimentaria e farmacéutica. En total, na explotación deste recurso participarán 27 embarcacións.
Ademais, outra das novidades do Plan Xeral de Explotación Marisqueira para o ano 2016 -que establece unha serie de normas para realizar a actividade extractiva como, por exemplo, épocas e días máximos de extracción e zonas de traballo- é a incorporación da confraría de Baiona á explotación das anemones, no que participan xa O Grove a A Illa de Arousa.
Outros recursos que incorporan varias confrarías aos seus plans de explotación como actividade complementaria para diversificar a súa actividade son o ourizo e as algas. Ademais son varias as entidades que, a través dos plans de explotación, prevén reiniciar a extracción comercial de reló, extracción que pode realizarse para o intervalo de tallas comprendido entre 30 e 35 milímetros.
Así, dos máis de 200 plans de explotación aprobados, 46 corresponden ás autorizacións administrativas marisqueiras, 48 son plans específicos para as zonas de libre marisqueo, 35 son para a extracción de percebe e 18 para equinodermos. Ademais 25 son para a extracción de solénidos (navalla, longueirón, longueirón vello), 6 son para a extracción de peneira, 18 para algas e 9 para a extracción de anemone.
As medidas de xestión para a explotación da centola, boi e do polbo, desenvolveranse no seu momento a través de plans de xestión específicos para estas pesqueiras. Do mesmo xeito, o uso do bou de vara e o bou de man para a extracción de moluscos bivalvos autorizarase a través dun plan de xestión para estas modalidades.
PERIODOS AUTORIZADOS PARA OS CRUSTÁCEOS
En relación a outros crustáceos, o plan establece que está permitido capturar nécora do 1 ao 5 de xaneiro e do 1 de xullo ao 31 de decembro. No caso do lumbrigante, o período autorizado de captura vai do 1 de xaneiro ao 31 de marzo e do 1 de xullo ao 31 de decembro.
No caso da lagosta, esta poderá extraerse entre o 1 de xaneiro e o 30 de setembro. En relación ao santiaguiño, o plan establece que se poderá capturar do 1 ao 5 de xaneiro e do 1 de outubro ao 31 de decembro. Ademais especifica que o conguito, o patulate e o cangrexo se poderán extraer durante todo o ano.