O Complexo Hospitalario de Pontevedra, acreditado como 'Hospital Seguro'
Por Redacción
O Complexo Hospitalario de Pontevedra destaca pola súa actividade de notificación de incidentes e eventos adversos que permite a súa análise e adoptar medidas correctoras que melloran a seguridade dos pacientes. Así o acredita o Sistema Español de Notificación en Seguridade en Anestesia e Reanimación (SENSAR) que lle concede a distinción de "hospital seguro".
No Complexo Hospitalario Universitario de Pontevedra levan a cabo, segundo a xerencia, ao redor de 20.400 intervencións cirúrxicas ao ano. Desde abril púxose en marcha o sistema de notificación de incidentes específico de anestesia, co obxectivo de analizar os erros detectados e adoptar medidas correctores para mellorar a seguridade.
Este sistema específico do servizo de anestesia convive no complexo hospitalario con outro que abarca a todo o ámbito hospitalario, o SINASP, Sistema de Notificación e Aprendizaxe para a Seguridade do Paciente, que desenvolve o Ministerio de Sanidade.
A acreditación SENSAR foi entregada durante o XXXII Congreso Nacional da Sociedade de Anestesioloxía, Reanimación e Terapéutica da Dor, celebrado en Santander.