A 144 quilómetros por hora nun tramo da estrada vella de Marín limitado a 50
Por Redacción
A Garda Civil imputou un veciño de Pontevedra de 63 anos por un delito contra a seguridade viaria tras ser 'cazado' circulando a 144 quilómetros por hora nun tramo da estrada vella de Marín coa velocidade limitada a 50.
Segundo informou a Garda Civil, o condutor, de iniciais L.A.M.F., foi detectado por un radar, pero non chegaron a darlle o alto no momento porque se desviou por unha vía anexa antes de chegar ao lugar onde estaban os axentes notificadores.
Os feitos ocorreron o pasado fin de semana na estrada PO-546, coñecida como estrada vella de Marín, pero dentro do termo municipal de Pontevedra. O radar do Subsector de Tráfico da Garda Civil detectoulle no punto quilométrico 3,300 conducindo o vehículo de alta gama Lexus modelo IS300H. Era unha zona de vivendas anexas á estrada.
Axentes do Grupo de Investigación de Accidentes de Tráfico da Garda Civil conseguiron localizar ao condutor este martes 27 e procederon á súa imputación, á vez que remitiron as dilixencias ao Xulgado de Instrución número 1 de Pontevedra. Terá que acudir ao xulgado cando sexa requirido.