CC.OO pide á Deputación que compre un autobús para Príncipe Felipe en lugar de alugalo
Por Redacción
O sindicato CC.OO pide que a Deputación Provincial de Pontevedra reserve unha partida do orzamento para o ano 2016 para a adquisición dun autobús para o transporte dos nenos da Cidade Infantil Príncipe Felipe.
A sección sindical na Deputación traslada a petición ao novo goberno provincial porque, desde o ano 2013, o autobús propiedade da Cidade Infantil non puido seguir realizando o transporte de nenos xa que, ao cumprir os 16 anos, a lei de tráfico impide continuar prestando este servizo.
No seu momento, a Deputación non fixo caso á petición de CC.OO para comprar un novo e optou por alugar un autobús sen condutor á empresa Monbús, cun custo mensual de 3.300 euros.
En opinión do sindicato, manter esta situación significa ter parte dun servizo cun custo moi superior ao que tería se o autobús fora propio da Deputación e "un malgasto de fondos que poderían ser destinados a outros fins sociais moi necesarios nestes momentos".