A Lama anuncia una actuación urxente polos danos do temporal na estrada de Fontecoba
Por Redacción
O mal tempo dos últimos días provocou importantes danos no Concello da Lama, especialmente evidentes na estrada de Fontecoba, moi afectada pola enorme cantidade de auga que se filtrou baixo o asfalto e provocou un baleirado da vía e enormes fochas que dificultan o tráfico rodado polo lugar. Para atallalos, o alcalde, Jorge Canda, revisounos ao longo da xornada deste martes e encargou aos operarios municipais que realicen labores de consolidación do firme .
A intervención neste viario é urxente para garantir a seguridade e o paso de vehículos e cidadáns ás súas vivendas, xa que unha gran tromba de auga coouse por baixo do pavimento e provocou o arrastre de terra ata baleirar o firme o que fixo que se fracturase con grandes fochas e fochancas.
O Concello realizará unha actuación de emerxencia cunha pa para corrixir provisionalmente os danos, retirando o pavimento en mal estado e asegurando a zona con xabre para permitir o paso de vehículos ata as súas casas. O alcalde anunciou que solicitaría o amparo da Deputación Provincial de Pontevedra para asfaltar de modo adecuado a vía.
Segundo informou o Concello, o temporal tamén tirou varios muros, provocou a entrada de auga en propiedades, o desprendemento de pedras e a caída de ramas e colectores de recollida de lixo. Durante toda a xornada deste luns, mobilizaron a todas as brigadas municipais para atender os problemas causados polo vento e as choivas.
Jorge Canda e o tenente de alcalde, Juan Carlos Piñeiro, atenderon persoalmente os requirimentos dos veciños para que as brigadas municipais desprazáranse a diferentes zonas do municipio para resolver incidencias.