Unha concentración reclamará este luns en Pontevedra un aborto "libre e seguro"
Por Redacción
Este luns é o día de acción global pola despenalización do aborto, unha convocatoria nada en Latinoamérica que se estendeu a todo o mundo e que tamén terá o seu eco na cidade de Pontevedra nunha concentración convocada ás 20.00 horas na Praza da Peregrina.
Esta iniciativa está apoiada por asociacións de mulleres de todo o estado e centrará as súas reivindicacións no acceso ao aborto das mozas de 16 e 17 anos a quen o goberno impuxo a obrigación de contar con permiso paterno para poder interromper o seu embarazo.
As convocantes esixen que o aborto "estea fóra do código penal" e "que ningunha muller sexa forzada a unha maternidade non desexada, nin se cuestione ou entorpeza a súa decisión de abortar", incluídas as de 16 e 17 anos, para quen reclama "que se respecte a súa autonomía" sen que os seus titores "nin moito menos os xuíces" teñan que mediar na súa decisión.
Ademais, reclaman que o aborto se garanta como prestación na rede sanitaria pública de forma accesible e gratuíta, independentemente da situación administrativa, e reivindican que se regule a obxección de conciencia do persoal sanitario "de forma que non sexa un obstáculo".