Tres detidos en Vilagarcía, un deles por sete roubos con intimidación e os outros dous por receptación
Por Redacción
Axentes da Policía Nacional da Comisaría de Vilagarcía procederon á identificación de dous homes de 22 e 55 anos de idade, e unha muller de 42 anos, un deles natural de Marrocos, con domicilio en Vilagarcía e con antecedentes policiais, como presuntos autores, un deles de varios roubos con intimidación e a parella por un delito de receptación.
Segundo informan fontes oficiais da Comisaría de Vilagarcía, desde o mes de xullo recibiran varias denuncias por parte de veciños da zona, que foran vítimas da subtracción de xoias utilizando un "modus operandi" concreto.
O autor dos feitos tras sorprender ás vítimas por detrás, algunhas delas de idade avanzada, que sufriron lesións motivadas polo tirón, arrincáballes as xoias que levaban colgadas ao pescozo.
En todas as denuncias as vítimas afirmaban sufrir un tirón da cadea ou gargantilla que levaban posta nese momento, en todos os casos xoias de ouro con crucifixos ou medallas. Recibíronse un total de ata sete denuncias de roubos con intimidación utilizando o mesmo modus operandi e tras elixir ao mesmo perfil de vítima.
Por mor das denuncias iniciáronse as investigacións para averiguar a identidade do presunto autor destes delitos, que foi detido polos axentes o día 21 de setembro.
Así mesmo tras arduas xestións os axentes da Comisaría da Policía Nacional de Pontevedra lograron identificar a dous individuos, un home e unha muller, con antecedentes policiais, que venderan as xoias que figuraban como subtraídas e que foron recoñecidas polos seus propietarios, aínda que a maioría delas non puideron ser recuperadas ao exceder o prazo estipulado, polo que foron detidos por un delito de receptación.
Unha vez detidos foron postos a disposición da Autoridade Xudicial.