Bueu ratifícase como municipio turístico en alza
Por Redacción
Ata 6.186 turistas pasaron pola Oficina de Turismo de Bueu durante este verán e a pasada Semana Santa. Un número, que segundo sinala a Concellería de Economía e Turismo, é o récord do últimos tres anos e supón unha tendencia á alza.
Os datos solicitados indican que se incrementa o turismo estranxeiro, fundamentalmente de orixe francesa, alemana e holandesa; ou que case o 33% destes visitantes xa estiveran con anterioridade no municipio buenense.
O maior número de turistas, son familias que elixen este destino pola súa contorna natural, gastronomía e en busca de tranquilidade. A media de estancia supera os sete días e o 42% dos visitantes alóxanse en hoteis e apartamentos.
Desde o Concello de Bueu, a concelleira de Turismo, Silvia Carballo, destaca a gran aceptación das rutas de sendeirismo gratuítas que se realizaron desde xullo; as visitas guiadas ao Museo Massó; ó as rutas pola vila para coñecer a súa historia e orixes. Iniciativas municipais como a Ruta das Tapas Mariñeiras, o FICBUEU, a Festa do Polbo, o Centro de Interpretación de Agrelo ou as carreiras deportivas serviron tamén para atraer máis visitas a Bueu.
Terminada a tempada de verán, a Oficina de Turismo seguirá aberta ata final de mes de 12 a 14 e de 17.30 a 20 horas, de luns a xoves; e de venres a domingo de 12 a 21 horas. As aulas de interpretación de Cabo Udra e Agrelo pasar a estar abertas ao público de venres a domingo de 11 a 20.30 horas.