Ampliarán a Casa da Cultura de Adina para que poida acoller, nun futuro, nunha nova cafetería
Por Redacción
Aproveitando a fin da concesión da cafetería instalada na Casa da Cultura de Adina, o Concello de Sanxenxo ampliará as instalacións e serán cedidas na súa integridade aos veciños. Así llo trasladou o grupo de goberno nos últimos días á xunta directiva da asociación de veciños da parroquia.
Gonzalo Pita, alcalde de Sanxenxo, confirmoulles que non se volverá a sacar a concurso a concesión deste servizo, que expira o próximo mes de marzo de 2016, unha vez que conclúa a cuarta e última prórroga que o actual concesionario podía asinar coa administración pública. En marzo, de querer manter a cafetería na Casa da Cultura, o Concello tería que convocar un novo concurso. Pero o Goberno local ten claro que prescindirá deste servizo.
"Foron moitas as polémicas derivadas da convivencia nesas instalacións dun uso cultural e lúdico con outro comercial, toda vez que ambas están nun espazo diáfano sen as separacións necesarias para que se poidan desenvolver as dúas actividades con plenas garantías", explica Gonzalo Pita.
A incompatibilidade de usos é, por tanto, a razón que esgrime o goberno local para prescindir provisionalmente dunha cafetería na Casa da Cultura. Iso si, non se descarta que nun futuro próximo se poida volver a contar con unha neste entorno cultural.
Para elo, o goberno local traballa xa na opción de ampliar a Casa da Cultura, dotándoa dun anexo que puidese acollela. Sería, en todo caso, con entrada totalmente independente e sen restar espazo ao salón social que os veciños necesitan para o desenvolvemento da intensa programación cultural que realizan ao longo do ano.
É necesario, por tanto, readaptar a estrutura actual da Casa de Cultura de Adina para conseguir a compatibilidade de usos buscada e conseguir que os usuarios non teñan que renunciar ao espazo que necesitan, á vez que os veciños poidan tamén dispor das comodidades que reporta a cafetería.