Barro acolle este domingo a terceira edición da súa feira de segunda man e troco
Por Redacción
A feira de segunda man e troco regresa a Barro. A praza situada diante das antigas instalacións do Concello e preto do pavillón polideportivo acollerá este domingo 20 de setembro a terceira edición deste mercado.
Os postos presentes no evento ofrecerán os seus produtos entre as 16:00 e as 20:00 horas.
Este ano a cita contará cun marcado carácter festivo e cultural ao coincidir co XVII Festival de Bandas de música de Barro no que participarán a Banda de Música de Castrelo, a Banda de Música de Sanxenxo e a Banda Xuvenil de Barro.
Os obxectivos principais desta cita son potenciar a reutilización de obxectos usados, dinamizar de forma socioeconómica a localidade e potenciar un consumo máis responsable.
Entre os clientes que realicen unha compra nalgún dos postos, os que recollan unha rifa tanto na OMIX como no Concello de Barro, sortearanse ás 20:00 horas unha cea romántica para dous no Muíño de Barosa, unha sesión de beleza no salón de peiteado Retokes, un lote de botellas de viño de Moraima e unha cesta de plantas ornamentais da empresa Transantonio.