Tráfico inicia unha campaña intensiva de control do uso do cinto e dos sistemas de retención infantil
Por Redacción
Os axentes da Garda Civil de Tráfico intensificarán a partir deste luns 7 ata o domingo 13 o control do uso do cinto de seguridade e dos sistemas de retención infantil (SRI), segundo informa a Dirección Xeral de Tráfico (DXT).
Esta iniciativa enmárcase dentro da programación de campañas e operacións especiais de vixilancia e control previstas por Tráfico para 2015 coa intención de mellorar a seguridade vial.
Durante esta semana, os axentes comprobarán que tanto o condutor coma os ocupantes dos vehículos fan uso do cinto de seguridade, ao tempo que comprobarán que os menores viaxan cos correspondentes sistemas de retención infantil axeitados á súa estatura, peso e idade.
A DXT estima que o uso do cinto reduce á metade o risco de morte en caso de accidente. En 2014, un 23% dos usuarios de turismos e furgonetas falecidos en sinistros producidos en vías interurbanas non utilizaban o cinto de seguridade. En zona urbana esta porcentaxe elévase ao 30%. No caso dos sistemas de retención infantil, a DXT indica que un neno sen suxeición multiplica por cinco as posibilidades de sufrir lesións mortais ou graves.
A pasada campaña desenvolvida entre o 8 e o 15 de marzo deste ano en Galicia, controláronse 53.680 vehículos e formuláronse 505 denuncias por estas infraccións. O incumprimento sanciónase con multa de 200 euros e perda de 3 puntos no caso dos condutores.