800 persoas pasaron polos obradoiros de ciencia mariña organizados en Portonovo
Por Redacción
A praia de Baltar, en Portonovo, foi a terceira parada do programa divulgativo 'Mergúllate no océano', promovido polo Campus do Mar da Universidade de Vigo.
Durante as xornadas de martes e mércores 800 persoas participaron nas diferentes actividades programadas, pensadas co obxectivo de achegar á cidadanía as ciencias e as tecnoloxías mariñas e concienciar da importancia de conservar en bo estado os océanos.
Realizando experimentos sinxelos os participantes nos obradoiros poden chegar a entender mellor os procesos que se dan no medio mariño, como o impacto das emisións de CO2, a orixe das praias ou a biodiversidade das costas galegas.
'Mergúllate no Océano' ofreceu sete obradoiros diferentes para todos os públicos nun recinto itinerante de 200 metros cadrados.
A iniciativa do Campus do Mar contou co apoio do Concello de Sanxenxo e a Confraría de Pescadores de Portonovo.