Descobre o mapa de infieis da comarca
Por Diego Espiño
"A vida é curta, ten unha aventura". Así anúnciase a web Ashley Madison, dirixida a persoas que buscan "citas casuais, encontros discretos e aventuras extramatrimoniais" e que foi recentemente vítima dun ataque informático que revelou datos persoais dos seus usuarios.
A través deses datos a empresa española Tecnilógica desenvolveu un mapa mundial coa procedencia dos máis de 30 millóns de usuarios de Ashley Madison, repartidos en máis de 50.000 localidades de 48 países.
Desa relación non escapa a bisbarra de Pontevedra, con datos que resultan rechamantes.
A capital provincial é a localidade máis infiel da bisbarra, con 2.829 usuarios rexistrados, só superado na provincia por Vigo (8.400). O curioso destes datos é que, seguindo a tónica xeral, o 90,7% das persoas que usan esta web na cidade de Lérez son homes.
Tras Pontevedra aparecen, por esta orde, Vilagarcía (912), Sanxenxo (351), Cambados (194), Vilanova (151), O Grove (145), Poio (142), Caldas de Reis (132), Bueu (131), Meis (102), Moraña (76), Meaño (67), Cuntis (55), Ribadumia (34), A Lama (25), Portas (19) e Ponte Caldelas (15).
En todas estas localidades a media de homes roza o 90%, sendo a máis alta da Bueu (96,05%) e a máis baixa a de Vilagarcía (87,28%).
Sorprende neste mapa a ausencia de datos no municipio de Marín, que non está incluído na relación.
O ataque informático ao portal de Ashley Madison foi reivindicado polo grupo de 'hackers' Impact Team, os cales xustificaron a acción na intención de deixar en evidencia a cantidade de perfís falsos de mulleres que interactuaban na web de citas.