Ceos anubrados na fin de semana máis festeira
Por Redacción
Este sábado, as Rías Baixas manteranse nunha zona de ventos moi suaves en superficie e aire frío en capas altas da atmosfera. Polas mañás, predominarán as néboas matinais e os intervalos anubrados coa posibilidade de que se produzan chuvias no litoral, segundo apuntan dende o Servizo de MeteoGalicia. As temperaturas apenas sufrirán cambios situándose entre os 13 e os 21 graos. O vento soprará frouxo de dirección variable, predominando o compoñente sur.
Na xornada de domingo, o tempo continuará caracterizado polos ventos suaves e o ambiente húmido. Os ceos permanecerán moi anubrados ou cubertos durante a mañá, coa posibilidade de néboas costeiras nas Rías Baixas. As temperaturas mínimas non sufrirán cambios mentres que as máximas ascenderán lixeiramente situándose arredor dos 23 graos. Os ventos soprarán frouxos de dirección variable, con predominio do compoñente oeste.
O tempo por tanto non será o mellor para a fin de semana máis festiva de Galicia con preto de 200 concellos con festas.
Galicia estará nunha zona intermedia entre as altas e as baixas presións con ventos do nordés a partir do luns. Desta forma, as temperaturas subirán lixeiramente. De novo está previsto que aparezan ceos despexados.