A fibra óptica chegará dende A Barca ata Combarro antes de rematar o ano
Por Redacción
A concelleira de Obras e Servizos no Concello de Poio, Chelo Besada, informou que a empresa Movistar iniciou os traballos para dotar de fibra óptica parte do municipio. Estes traballos coinciden cos que está a levar a cabo a operadora de cable R, co que os veciños poderán optar entre estas dúas compañías para gozar deste moderno servizo.
Durante estes días técnicos da empresa Telefónica empezaron cos traballos de cableado na parroquia de San Salvador e seguirán a continuación pola de San Xoán ata o porto deportivo de Combarro, aínda que non está previsto que actúen no casco histórico nin na zona de Saíñas.
A instalación da fibra óptica estase a levar a cabo a través da rede xa existente de canalización subterránea, combinándoa co tendido aéreo existente das súas propias instalacións ao longo da PO-308, e mesmo polas fachadas alí onde non sexa posible levar os cables por calquera das dúas fórmulas anteriores.
Chelo Besada explicou que os veciños poderán optar a un servizo que lles ofrece ata un máximo de 300 megas e trasladou a intención de Movistar de continuar no 2016 por outras parroquias como Samieira e Raxó.