Tres empresas dispútanse, a priori, o novo contrato de xardíns de Pontevedra
Por Redacción
Elsamex, Orto Parques y Jardines e Cespa. Son as tres empresas que, a priori, contan con máis opcións para adxudicarse o novo contrato de mantemento e conservación de xardíns e zonas verdes de Pontevedra. Así quedou de manifesto tras a reunión da mesa de contratación na que se realizou a apertura do sobre B, no que as ofertantes explican como é a xestión do servizo que propoñen.
Estas tres compañías recibiron unha valoración similar por parte dos técnicos municipais que, durante os últimos cinco meses, revisaron a inxente documentación presentada polas oito empresas que se presentaron ao concurso.
En concreto, o informe valora a xestión do servizo, a organización, os vehículos e a maquinaria que propoñen empregar ou a mellora dos espazos verdes do municipio que formula cada unha das ofertantes.
Por iso, o concelleiro de Facenda indicou que será a oferta económica que incluísen estas empresas nas súas propostas a que determine quen conseguirá este suculento contrato. Nela, incluíuse o prezo do servizo, o número de traballadores ou o incremento das zonas a coidar.
A mesa de contratación volverase reunir este mércores, a partir das dez e media da mañá, para revisar estas ofertas e propoñer un adxudicatario. Iso será, salvo que algunha empresa incorrese en baixa temeraria -fixar unha cantidade a sabendas da cal non poderán cumprir o ofertado-, en cuxo caso se dará un prazo para xustificar a proposta presentada.
O PP VOLVE CRITICAR O CONTRATO
Ao fío desta mesa de contratación, o Partido Popular volveu denunciar o atraso que acumula este contrato, ante o cal eles mesmos presentaron un recurso ante o Tribunal Administrativo Central ao entender que había irregularidades no seu prego. Segundo César Abal resulta "sorprendente" que tarden cinco meses en revisar esta documentación e reclamou explicacións "claras e nítidas" sobre todo este expediente.
Relacionadas:
-
Cespa comezará a encargarse das zonas verdes da cidade antes de que acabe o mes
Por Alejandro Espiño |
-
Cespa asumirá o mantemento de xardíns e zonas verdes os próximos catro anos
Por Alejandro Espiño |
-
A Fiscalía solicita unha prórroga para seguir investigando o caso Elsamex
Por Oskar Viéitez |
-
O Tribunal Administrativo Central referenda o contrato de mantemento de xardíns que cuestionaba o PP
Por Natalia Puga |
-
Oito empresas optan ao novo contrato de mantemento de xardíns e zonas verdes
Por Redacción |