Sanxenxo, de novo capital mundial dos colchóns inchables
Por Redacción
Sanxenxo volverá ser escenario do Campionato Mundial de Colchóns Inchables. Esta divertida competición, organizada pola Asociación O Cubreiro, chegará á súa sétima edición o próximo domingo 12 de xullo.
A saída será dende a praia da Panadeira. Os ousados participantes sairán en varias quendas. Os nenos ata 9 anos farano ás 13:00 horas, os de 10 a 14 ás 13:30 horas e os adultos ás 14:00 horas.
Dende hai xa sete anos celébrase este concurso no que os participantes, enriba dun colchón de praia e disfrazados, se lanzan á auga co único obxectivo de divertirse.
Este ano, ademais dos tradicionais premios aos tres mellores de cada categoría, ao mellor disfraz adulto e infantil e aos colchóns máis orixinais, engádese o premio ao mellor disfraz en grupo.
Como cada ano este evento que atrae máis xente, a asociación espera superar os 200 participantes do ano pasado. A eles hai que sumar o numeroso público que se achega a ver a proba dende o paseo de madeira que vai dende A Panadeira ata a praia dos Barcos. Uns e outros, prometen, teñen a diversión garantida.