Tres estudantes de secundaria da cidade, premios extraordinarios ao rendemento académico
Por Redacción
A Consellería de Cultura, Educación e Ordenación Universitaria acaba de recoñecer o labor diario de tres estudantes de ensino secundario da cidade de Pontevedra coa concesión de premios extraordinarios ao rendemento e ao esforzo e superación persoal.
Os galardoados son estudantes que durante o ano académico 2011/2012 cursaron cuarto da ESO no réxime ordinario nos institutos Frei Martín Sarmiento, Sánchez Cantón e Gonzalo Torrente Ballester.
Os premios foron concedidos a 40 estudantes de ensino secundario de toda Galicia, 20 ao rendemento e outros 20 ao esforzo e superación persoal. Con estes premios a Consellería de Educación quere fomentar entre o alumnado a cultura do esforzo no estudo, reforzando aqueles aspectos que inciden na mellora do sistema educativo, e xuntando excelencia con equidade, igualdade de oportunidades e posibilidades de desenvolvemento persoal.
Coa convocatoria de premios ao esforzo e á superación persoal recoñécense e valóranse publicamente os comportamentos excepcionais do alumnado dos niveis da educación básica, co fin de seguir avanzando na consecución dunha igualdade de oportunidades efectiva, e de procurar un ensino comprensivo e integrado.
Respecto da modalidade de rendemento académico, na que foron premiados os tres pontevedreses, os candidatos debían contar cunha media nas cualificacións dos catro cursos da ESO igual ou superior a 9 puntos, ademais de superar unha proba específica para acadar o premio.