Dous detidos tras unha espectacular persecución policial de madrugada entre O Vao e Vilagarcía
Por Natalia Puga
A tranquilidade da media noite viuse alterada en Pontevedra, Poio, Barro e Vilagarcía, así como en todas as localidades existentes no percorrido entre un e outro lugar. Un vehículo que saía do poboado chabolista do Vao desoíu as ordes dunha patrulla da Policía Nacional para que se detivese e comezou unha fuxida que lle levou por media bisbarra ata que a frustrou un accidente na N-640 na capital arousana e os seus dous ocupantes remataron detidos e feridos no hospital.
Segundo informaron fontes da Policía Nacional, unha patrulla que realizaba labores de prevención nas inmediacións do Vao viu un vehículo con dous ocupantes e quixo dalo o alto, pero a reacción do condutor foi inmediata e fuxiu en dirección a Cerponzóns e Barro, chegando ata a zona da discoteca La Luna mentres era perseguido por dous vehículos policiais, un deles camuflado e o outro rotulado.
Nun momento dado, o coche cambiou de dirección dirixiuse cara á estrada de Vilagarcía, todo con manobras bruscas de condución que puxeron en perigo outros condutores e nas que pretendía acantoar as patrullas policiais. Xa á altura da N-640 no acceso ao porto de Vilagarcía, uníranse á persecución patrullas da Policía Local e Nacional de Vilagarcía e da Garda Civil de Tráfico e o coche da fuxida acabou colisionar coa mediana.
Froito da colisión, os dous ocupantes tiveron que deter a marcha, de modo que nese momento o coche puido ser inteceptado polas patrullas policiais e os dous individuos que viaxaban nel foron detidos. Ambos os dous foron trasladados ao Hospital do Salnés con pequenas lesións e un deles recibiu a alta pouco despois e foi posto en liberdade con cargos. O segundo implicado foi derivado ao Hospital Domínguez de Pontevedra, onde permanecía a mediodía deste sábado, pero xa en situación de liberdade.
Os dous homes están acusados dun delito contra a seguridade vial e doutro de desobediencia á autoridade. Trátase de dous homes de 46 e 51 anos con antecedentes policiais aos que ademais lles foron localizadas dúas papelinas con droga que presumiblemente estarían destinadas ao seu propio consumo.