Un condutor sofre un accidente en Cambados e foxe do lugar deixando o copiloto ferido
Por Redacción
Un mozo resultou ferido tras sufrir un accidente de tráfico ante o Parador de Cambados durante a madrugada do sábado a este domingo 7. Un particular alertaba ás 04.25 horas a Protección Civil de Cambados para que acudisen ata o lugar onde se producira o impacto ao saírse o vehículo da vía.
Cando axentes da Policía Local chegaban ata a zona non encontraron o condutor do vehiculo e os membros do Posto de Atención Continuada de Cambados trasladaban o copiloto que se doía das contusións sufridas no peito e na man. Non foi necesaria a excarceración a pesar do estado no que quedou o turismo no que viaxaban. O ferido é veciño de Vilanova e ten 23 anos, segundo informa Protección Civil de Cambados.
As forzas de seguridade intentan localizar agora o outro ocupante do vehículo. O espectacular accidente provocou que durante dúas horas se tivese que cortar o carril dirección a Tragove para limpar a calzada e retirar o auto.