Os heroes de Ponte Sampaio repiten vitoria contra as tropas de Napoleón
Por Diego Torrado
A parroquia de Ponte Sampaio volveu converterse no escenario do enfrontamento entre os veciños e as tropas napoleónicas que se produciron en xuño de 1809.
206 anos máis tarde, os veciños ante numeroso público recrearon, baixo as altas temperaturas, a batalla na que as xentes do pobo se rebelaron contra o exército francés e evitaron a súa entrada pola ponte dos dez arcos que une á parroquia con Soutomaior.
A festividade, organizada pola asociación veciñal Héroes de Ponte Sampaio, contou cunha tradicional ofrenda floral na que se recordou a todos aqueles veciños que faleceron na cruenta batalla orixinada durante a Guerra da Independencia.
E como non podía ser doutro xeito, toda a celebración finalizou cunha degustación de polbo e produtos típicos, ademais das actuacións de Coribantes de Buchabade e de Airiños da Peneda.