A Xunta destina máis de 456.000 euros á ampliación do CIFP A Xunqueira
Por Redacción
O Diario Oficial de Galicia publica este venres a resolución da Consellería de Cultura, Educación e Ordenación Universitaria pola que se licita a contratación da obra de ampliación do CIFP A Xunqueira, cun orzamento de 456.413,71 euros, unha actuación cofinanciada polo Fondo Europeo de Desenvolvemento Rexional.
Coa execución desta obra pecharanse os laterais da antiga pista polideportiva cuberta para o acondicionamento neste espazo de 635,12 metros cadrados en superficie construída de 624,23 metros cadrados en superficie semiaberta, ademais dunha pasarela exterior cuberta de 77,80 metros cadrados para conexión coas edificacións existentes.
As novas instalacións acolleran: un taller de madeira para a FP Básica, un almacén e un lugar para que o alumnado poda realizar prácticas de montaxe das casas prefabricadas de madeira e estruturas similares. O inicio das obras está previsto contra o verán, co fin de evitarlle as molestias á comunidade educativa.
A Xunta salienta nun comunicado que "o investimento da Consellería na ampliación do CIFP A Xunqueira convértese nunha clara demostración do seu apoio ós estudos de FP e reforza a estratexia de posta en valor dos mesmos que se ten desenvolvido nos últimos anos".