Centos de nenos participarán o luns na XXII Carreira Escolar do Salnés
Por Redacción
A Carreira Escolar do Salnés chegará o vindeiro luns 8 de xuño á súa vixesimo segunda edición no colexio Abrente de Sanxenxo coa aspiración de que participen máis dun millar de participantes. A actividade ten un carácter deportivo e cultural baixo o lema 'En galego gañamos tod@s'.
Os responsables da carreira presentárona este mércores explicando que partirá ás 11.00 horas do colexio Abrente, situado en Adina (Portonovo), e chegará ao mesmo lugar. Discorrerá por un circuíto pechado totalmente ao tráfico rodado, co que a seguridade está garantida.
Ao respecto, lembran que co paso dos anos, esta proba estase a converter nunha clásica do deporte da comarca. Centos de rapaces xúntanse cada ano para correr polas rúas de Sanxenxo no que quere ser, ademais dunha proba deportiva, unha manifestación dos nenos en pro do atletismo. Está pensada tamén como canle de achegamento e comunicación; así como para sensibilizar as autoridades para que doten a Sanxenxo dunhas instalacións de atletismo dignas.