Poio reforza as oficinas de turismo con tres novos traballadores no verán
Por Redacción
As oficinas de turismo municipais de Poio incorporarán tres novos traballadores coincidindo co inicio da tempada estival. Dúas bolseiras contratadas polo Concello e unha técnico de turismo subvencionada pola Xunta de Galicia comezarán a traballar o 15 de xuño co fin de prestar un servizo amplo e de calidade ós milleiros de visitantes. En total, haberá traballando no municipio sete profesionais da rama do turismo durante toda a tempada.
Ademais, a partir do 15 de xuño a oficina de turismo de Combarro permanecerá aberta de luns a domingo en horario de mañá e tarde de 10.30 a 14.00 e de 16.30 a 20.30 horas. A oficina de turismo do Casal de Ferreirós tamén ampliará o seu horario e abrirá de luns a venres de 09.00 a 14.00 e de 17.00 a 20.00 horas.
A Casa Museo de Cristóbal Colón situada en Porto Santo, que conta cunha exposición permanente adicada a figura do navegante, pasará a prestar servizo como oficina de turismo. Permanecerá aberta durante toda a tempada estival de luns a sábado en horario de 10.30 a 14.30 e de 16.30 a 20.30 horas.
Segundo os datos facilitados pola Concellaría de Turismo de Poio, o pasado mes de maio as dúas oficinas de turismo municipais situadas nas parroquias de San Salvador e Combarro rexistraron un total de 615 visitantes, dos que un 19,36% foron estranxeiros. Dos españois, o 26,04% procedían de Galicia, o 25,02% de Madrid e o 16,66% de Castela e León.