Centos de persoas converten, de novo, a Festa da Troita nun gran éxito de público
Por Diego Torrado
É unha cita obrigada, marcada en vermello no calendario cada último domingo do mes de maio, tal e como vén sucedendo dende o ano 1967. Dende entón a Festa non fixo máis que crecer da man do evento gastronómico que esta fin de semana ten previsto despachar 800 quilos deste salmónido, frito ou en escabeche e a catro euros a ración.
Ao longo de todo o sábado foron centenares as persoas que acudiron a Ponte Caldelas para participar desta actividade festiva declarada de interese turístico galego.
Os postos instalados no recinto da Alameda foron o epicentro dunha Festa que contaxiou a animación polas rúas e prazas da vila en diversas actuacións musicais, como a do certame de corais, os grupos de música tradicional, ademais da verbena nocturna.
Preto dun centenar de pescadores participan tamén no Concurso Internacional da Festa da Troita de Ponte Caldelas. As categorías sénior e veteranos xa competiron na captura dos mellores exemplares do río Verdugo, este domingo será a quenda das damas, xuvenís e infantís.
O programa inclúe este domingo VIII Festival de Baile, na Alameda, coa participación do grupo folclórico " Os Coribantes de Buchabade", o grupo de baile "Xaldón", de Corcubión e o grupo A.C.D. Atlántica, de Matamá.
Ademais prométese un fin de festa ao grande coa esperada actuación da orquestra París de Noia.