A empanada de millo volve reinar en Salcedo
Por Redacción
Centos de persoas achegáronse este sábado ás inmediacións da igrexa de Salcedo para participar na décimo quinta edición da Festa da Empanada de Millo da parroquia.
Esta tradicional cita gastronómica, organizada pola asociación cultural Santa Rita, repartiu máis dun millar de porcións deste exquisito produto. Zamburiñas, xoubas ou bacallau foron as variedades que, un ano máis, triunfaron entre os comensais.
O bo tempo que fixo en Pontevedra este sábado non restou afluencia a unha festa que non só atraeu a veciños tanto da parroquia coma do centro urbano. A coincidencia co día de reflexión das eleccións provocou que, ademais, fosen moitos os políticos que se deixaron ver pola festa.
Miguel Anxo Fernández Lores, Agustín Fernández ou Rafael Louzán foron tan só tres dos que gozaron desta festa que, xa consolidada no calendario festivo pontevedrés, goza dunha saúde envexable.