O fiscal pide 22 anos de prisión para tres acusados relacionados coa incautación de 2 quilos de heroína
Por Redacción
A fiscalía solicita nove anos de prisión para Javier Casal, veciño de Ponteareas e sete anos e medio para os macedonios Nuran S. e Lokman J. por un delito contra a saúde pública, ao estar relacionados cos dous quilos de heroína que incautou o Equipo contra o Crime organizado de Galicia da Garda Civil na Estación de autobuses de Vigo en febreiro de 2013. O fiscal destacou que a droga incautada ofrece un 43,75% de pureza, máis do dobre da que se consume na rúa.
Durante a vista oral que se desenvolveu durante a mañá deste martes 19 na Audiencia Provincial, Nuran S. que trasladaba a droga e Javier Casal, que era o destinatario, recoñeceron os feitos e declararon ante a xuíza que non podían falar da persoa que lles subministraba a droga, se referían a el como Haid, porque os ameazara. "No puedo dar detalles. Me amenazó. No puedo decir nada", afirmou Nuran S. durante o xuízo. O terceiro procesado, Lokman J., residente en Barcelona, a quen se lle acusa de ser o enlace da operación, a raíz dunhas mensaxes enviadas a través dun teléfono Blackberry, manifestou que xamais tivera contacto con ese móbil.
Os axentes da Garda Civil que interviñeron neste caso testificaron que o teléfono Blackberry era utilizado por Lokman e tamén pola súa filla Nerea, que non chegou a declarar na sala porque a moza rompeu a chorar e a avogada da defensa renunciou ao seu testemuño. O móbil, segundo os axentes, tamén se empregaba por Nuran. En ambos os dous casos, deducíase polas conversacións, isto sucedía sempre que Lokman se encontraba de viaxe. Nas conversacións que se recollían no Blackberry con Javier Casal ofrecíanse datos de como ía realizarse a entrega e da cantidade de heroína que se trasladaba.
Tanto Javier Casal coma Nuran recoñeceron que aceptaran intervir na operación pola mala situación económica familiar que atravesaban. O fiscal solicita unha maior pena para o veciño de Ponteareas por ser reincidente. Os tres acusados encóntranse en prisión dende que foron detidos en 2013.