Comeza a veda do polbo, que rematará o vindeiro 1 de xullo
Por Redacción
Este sábado comeza a veda do polbo, que se prolongará ata o vindeiro 1 de xullo. Así o recolle a resolución do plan experimental para a xestión desta especie para a campaña 2015-2016, que establece o período de veda do polbo para este ano dende as 00:00 horas do 16 de maio ata as 6:00 horas do 1 de xullo de 2015.
As capturas desembarcadas o 15 de maio poderán ser comercializadas tamén o 16 de maio naquelas lonxas nas que tradicionalmente se viñesen realizando vendas de polbo os sábados.
O período de veda do polbo significa que queda expresamente prohibida a captura desta especie, por medio de calquera arte, en augas de Galicia.
Polo tanto, as embarcacións dedicadas á captura de polbo con nasas deberán retiralas do seu calado e levalas a porto.
Este tempo de veda é tamén aplicable á pesca marítima de recreo e ás capturas acadadas con calquera outra arte distinta da nasa para polbo.
A veda é unha das medidas técnicas que comprende o plan de experimental do polbo, co fin de axustar a xestión pesqueira ao ciclo de vida da especie e así protexer a súa reprodución e contribuír a unha explotación máis sustentable.