Detido por ameazar tres persoas cun coitelo ao berro de "te mato, te mato"
Por Redacción
Un pontevedrés foi detido de madrugada por presuntamente ameazar cun coitelo a tres persoas mentres camiñaban por unha rúa do casco histórico ao tempo que lles berraba "te mato, te mato".
Todo aconteceu arredor das 2.20 horas do domingo ao luns nas inmediacións da praza Méndez Núñez. Tres persoas cruzáronse cun individuo e este, sen motivo aparente, empezou a insultalos. Cando lle recriminaron a súa actitude, sacou un coitelo do peto e achegouse a eles con actitude ameazante e berrando.
Os tres viandantes fuxiron e pouco despois atoparon unha patrulla da Policía Nacional e relatáronlle o sucedido. Os axentes, tras solicitar datos do individuo, iniciaron inmediatamente un dispositivo de busca.
Froito dese operativo, na rúa San Bartolomé localizaron un home cuxa descrición física se correspondía coa achegada polos denunciantes. Cando trataban de identificalo, saíu fuxindo a toda velocidade en dirección á ponte das Correntes, onde foi interceptado polos axentes, que procederon á súa detención.
Nun cacheo de seguridade os axentes encontraron o coitelo co que presuntamente ameazara os viandantes momentos antes. Por todo iso os axentes procederon á detención do presunto autor das ameazas graves.
O home, de 46 anos e con antecedentes policiais, foi posto a disposición do Xulgado de Garda de Pontevedra, segundo informou a Policía Nacional.