O asfaltado de Sagasta, Joaquín Costa e Peregrina deixará cortes de tráfico o sábado
Por Redacción
O asfaltado das rúas Sagasta, Joaquín Costa e Peregrina deixará este sábado 9 de maio diversos cortes de tráfico. A Policía Local deseñou un operativo especial de tráfico para minimizar o impacto da actuación, que xa realizan nun sábado co fin de prexudicar o menos posible aos cidadáns.
Segundo informou o Concello, o asfaltado e o fresado realízanse aproveitando a primavera para alongar o máis posible a vida útil dos pavimentos. Trátase de recuperacións parciais do asfaltado naqueles tramos que se atopen máis deteriorados.
A primeira rúa afectada será Sagasta, na que se realizará o fresado a partir das 8.30 horas ata aproximadamente as 10.30. Xusto despois comezarán os traballos na rúa Peregrina, que se prolongarán ata as 11.30. Entre esa hora e as 12.30 prevese poder rematar o tramo de Joaquín Costa. Os asfaltados serán a continuación.
En Sagasta haberá operarios en tres puntos filtrando vehículos e permitirán só acceder a garaxes e ao hospital e realizar as tarefas de carga e descarga. Eses vehículos poderán circular pola rúa Benito Corbal.
Na rúa Peregrina haberá operarios en dous puntos filtrando vehículos, que só poderán acceder para ir aos garaxes e realizar tarefas de carga e descarga. A circulación procedente de Sagasta desviarase por Joaquín Costa e permitirase o acceso ao circuíto das rúas Peregrina e Frei Juan Navarrete.
En Joaquín Costa haberá operarios en dous puntos filtrando vehículos, que só poderán acceder para ir aos garaxes e á Comisaría da Policía Nacional e realizar tarefas de carga e descarga.
En vindeiros días continuarase co asfaltado parcial das rúas Conde Bugallal, Domingo Fontán, Filgueira Valverde, Juan Carlos I e a subida aos Areás.