15 alumnos de Medicina estudiarán o último curso no CHOP de Pontevedra
Por Redacción
O decano da Facultade de Medicina da Universidade de Santiago, Juan Gestal, estima que serán 15 os alumnos os que estudarán o último curso da carreira no Complexo Hospitalario Universitario de Pontevedra.
É a primeira consecuencia directa do principio de acordo que as consellarías de Sanidade e de Cultura, Educación e Ordenación Universitaria, e as universidades de Santiago de Compostela, A Coruña e Vigo (á que pertence o campus de Pontevedra) asinaron esta semana.
Son as bases dun futuro convenio que establece que a partir do curso 2015-2016 o profesorado das institucións académicas viguesa e coruñesa, que imparte docencia en titulacións propias desas universidades de áreas de coñecemento relacionadas coa medicina, poderá colaborar na docencia clínica do Grao en Medicina da Universidade de Santiago de Compostela (USC).
O documento, que establece os principios dun acordo específico a asinar en breve, foi ratificado o mércores en San Xerome polos máximos responsables das tres institucións educativas, Juan Viaño, Xosé Luís Armesto e Salustiano Mato, e os conselleiros Román Rodríguez e Rocío Mosquera.
Este acordo permite unir os recursos e o talento dos profesionais dos grandes hospitais universitarios de Galicia, para a formación do alumnado no grao en Medicina da Universidade de Santiago de Compostela, situando a responsabilidade académica do Grao en Medicina na USC, sendo os órganos de goberno e os departamentos da facultade compostelá, a única que imparte no SUG o grao en Medicina, os encargados da planificación e organización docente da titulación.
Ademais, isto vai permitir xa dende este próximo curso aumentar de 350 a 360 as prazas de Medicina na USC.
A partir de agora o Consello para a Coordinación da Docencia Clínica en Galicia proporá ao reitor da USC, previa proposta das universidades da Coruña e de Vigo, o persoal que pode colaborar na docencia clínica do grao de Medicina nos seus hospitais universitarios.
A facultade da USC disporá deses docentes determinando, para cada curso académico, as áreas, materias e créditos nos que impartirán docencia. Agás acordo expreso, para cada área de coñecemento o número de persoal docente e investigador das outras universidades adscrito a esta modalidade non poderá superar un máximo que se fixará ao redor do 15% das necesidades de persoal que teña a USC na área afectada.