Aberto o prazo para solicitar axudas municipais para a creación de empresas en Vilagarcía
Por Redacción
Coa publicación no Boletín Oficial da Provincia do pasado luns, día 30 de marzo, xa está aberto o prazo para a presentación de solicitudes de axuda coa finalidade de crear unha empresa en Vilagarcía de Arousa. O programa de emprendemento, que inclúe formación e axudas directas, conta cun presuposto de 60.000 euros, e está promovido polas concellarías de Emprego e de Xuventude.
Poderán acollerse a estas axudas os empresarios, as persoas individuais e as pequenas e medianas empresas, independentemente da súa forma xurídica, que teñan iniciado a súa actividade empresarial entre o 1 de xaneiro e o 31 de decembro do ano en curso, entendendo como "inicio da actividade" a data de alta no IAE.
As axudas son a fondo perdido e subvencionan gastos da posta en marcha e do funcionamento da empresa durante os primeiros meses de actividade. Os importes serán o 50% dos gastos efectuados para a constitución e posta en funcionamento cun máximo de 2.000 euros.
Nas bases se establecen os gastos subvencionables, que van dende os de constitución e apertura (proxectos técnicos, licenza de obra, alta no Rexistro Mercantil, etcétera) ata o financiamento das existencias iniciais de mercancías ou os gastos de aluguer do local.
Trala publicación no BOP da provincia, o procedemento para a concesión de axudas iniciarase de oficio, tramitándose en réxime de concorrencia non competitiva. Trala avaliación técnica, a Xunta de Goberno Local aprobará ou denegará as solicitudes.