Máis de 2.800 novatos estréanse o 24 de maio
Por Redacción
Máis de 2.800 mozos do Concello de Pontevedra poderán votar por primeira vez nuns comicios municipais. Son 562 máis que nas eleccións europeas de 2014.
Na provincia de Pontevedra están chamados ás urnas o 24 de maio 776.718 electores residentes en España e 3.768 no estranxeiro, segundo os datos publicados polo Instituto Nacional de Estatística.
En Galicia son un total de 82.354 mozos os que poderán acudir a votar por primeira vez nunhas eleccións locais, é dicir, que non cumpriran a maioría de idade na anterior cita coas urnas, en maio de 2011.
Se nos cinguimos ao dato daqueles que non puideron votar nunca e agora xa poderán facelo a cifra quédase en 19.809 mozos, dos que o 38% son da provincia de Pontevedra.
Ás eleccións municipais do 24 de maio non están convocados os pontevedreses que viven no exterior, algo que xa aconteceu nos comicios municipais de 2011, o que provocou protestas entre aqueles que emigraron.