O dono dun bazar chinés de Bueu sofre queimaduras nas mans nun incendio
Por Redacción
O propietario dun bazar chinés resultou ferido este sábado a causa dun lume orixinado no interior do seu baixo comercial, situado na Rúa Montero Ríos de Bueu.
Segundo informou o Centro de Atención de Emerxencias 112 de Galicia, o ferido trasladouse polos seus propios medios ao centro de saúde de Bueu logo de sufrir diversas queimaduras nas mans e de ter inhalado certa cantidade de fume.
O incendio afectou a varios nobelos de lá, alfombras e mobiliario e, segundo informaron os Bombeiros do Morrazo, o dono intentou sufocar o lume utilizando varios extintores da cafetería Jardín, situada ao lado do seu estalecemento. Ao realizar esas tareas, sufriu as citadas queimaduras.
Ademais do propietario, ningunha outra persoa resultou afectada por este lume do que un particular alertou ao 112 arredor da 16.00 horas deste sábado. Dende o Centro de Atención ás Emerxencias de Galicia púxose en marcha un operativo no que participaron os Bombeiros do Morrazo e Protección Civil de Bueu, así como a Policía Local.