Unha muller e o seu bebé resultan feridos nun accidente en Cambados
Por Redacción
Unha muller de 32 anos e o seu fillo de tan só 13 meses resultaron feridos este sábado nun accidente de tráfico rexistrado en Cambados. Ambos os dous requiriron asistencia sanitaria se ben as feridas eran inicialmente leves.
Segundo informaron dende Emerxencias de Cambados, o sinistro produciuse na estrada PO-300 ao seu paso por Cambados na mañá deste sábado. Por motivos que se descoñecen, o vehículo Peugeot 206 no que viaxaban saíuse da vía e chocou cun elemento de seguridade situado na calzada. A consecuencia do impacto sufriu importantes danos materiais na defensa dianteira.
O Centro de Atención de Emerxencias de Galicia 112 desprazou ao lugar a efectivos de Protección Civil de Cambados e efectivos do subsector de Tráfico da Garda Civil, que tiveron que regular a circulación pola estrada PO-300 mentres se realizaban tarefas de limpeza da calzada e unha grúa retiraba o vehículo sinistrado.
Ademais, unha ambulancia do 061 prestou unha primeira asistencia ás dúas persoas feridas no lugar do accidente e posteriormente procedeu ao seu traslado ao hospital.