Localizan unha moza de 16 anos desaparecida varias horas en Pontevedra
Por Redacción
Unha moza de 16 anos permaneceu desaparecida durante varias horas deste xoves en Pontevedra, pero foi localizada a media tarde pola súa propia familia. A súa desaparición causou grande alarma a través das redes sociais e entre os alumnos e pais dos distintos centros educativos de Pontevedra, pero tanto a Policía coma a familia confirman que apareceu en perfecto estado.
A menor estuda no instituto Gonzalo Torrente Ballester e a súa desaparición empezou a ser investigada pola Unidade de Delincuencia Especializada e Violenta (UDEF) da Policía Nacional unha vez que a primeira hora da tarde os seus pais presentaron denuncia na Comisaría. Previamente, a familia xa difundira a súa imaxe polas redes sociais achegando como contacto, entre outros, o número do seu primo.
Fontes próximas á familia explicaron que os pais deixaron a moza no instituto a primeira hora da mañá, pero ela xa non chegou a acudir a ningunha clase. Dende o centro educativo confirmáronlle posteriormente a súa ausencia en todas as clases da mañá.
Un primo da moza confirmou a PontevedraViva que levou o seu teléfono móbil, pero durante horas estivo apagado. A familia tamén comprobou que se levara de casa dúas mochilas e todos os seus aforros, circunstancias que confirman que se foi de casa voluntariamente e non quería contactar con ninguén nin que se puxesen en contacto con ela. Puido estar en compañía dunha segunda persoa, pero finalmente localizouna a súa propia familia.