Paradela reformará a súa Casa do Pobo grazas a unha subvención do Concello de Ponte Caldelas
Por Redacción
Unha subvención de 21.000 euros permitirá á Comunidade de Montes de Paradela financiar a reforma integral da súa Casa do Pobo. Este convenio de colaboración foi asinado hai uns días polo alcalde de Ponte Caldelas, Perfecto Rodríguez, e os propios comuneiros.
O goberno municipal incluíu esta cantidade no presuposto de 2015 como subvención nominativa para poder reformar integramente esta construción, que se encontraba nun estado case ruinoso. Ao ser unha construción de titularidade veciñal e non municipal a única forma que ten o Concello para colaborar é mediante unha subvención nominativa.
Está previsto que as obras se inicien durante o presente mes de marzo e que se finalicen antes do verán. A actuación considera a reforma da cuberta, o acondicionamento do pequeno local de reunións coa renovación de instalacións eléctricas e de fontanaría, así como o baixo destinado a almacén e baño.
Tamén se acondicionará o patio de entrada a esta casa cun muro perimetral aproveitando a pedra existente e eliminando un vello galpón de bloques que existía neste. Así quedará máis espazoso e poderá ser utilizado para actividades cando non chova.
No presuposto de 2015 tamén se prevén outras subvencións para distintas reformas nas casas o pobo de Buchabad, Barbudo, Vilarchán e Rebordelo por un importe total de 54.700 euros, incluíndo a de Paradela.