Perfecto Rodríguez di que as empresas propietarias do tanatorio "só pretenden confundir e marear a perdiz"
Por Redacción
O alcalde de Ponte Caldelas, Perfecto Rodriguez, pediu ás empresas propietarias do tanatorio que "aclaren dunha vez por todas se teñen ou non pensado reabrir esta instalación e que deixen de marear e confundir á cidadanía e que cumpran co seu compromiso cos asegurados veciños do municipio".
Perfecto Rodríguez manifesta que "se non teñen intención de reabrilo lles pido que o poñan en venda, porque me consta expresamente que outras empresas funerarias estarían interesadas en adquirir as instalacións. Os veciños do municipio non nos cremos que o motivo do peche sexan os danos menores que ten a instalación e que serían doadamente subsanables".
Por outra parte, en referencia ás afirmacións do xerente de Alianza e Barros sobre municipalizar o servizo, o alcalde asegura que "só pretenden confundir e marear a perdiz". Ademais Perfecto Rodríguez aclarou que "o Concello non pode como administración pública asumir ningunha débeda dunha empresa privada copropietaria do tanatorio. Sería totalmente absurdo" e sinalo con rotundidade que "se tivesen intención de vendelo habería empresas funerarias interesadas en adquirilo.
O alcalde aclarou tamén que o servizo de tanatorio non é propiamente un servizo de competencia municipal coma si o é, por exemplo, o de cemiterio ou enterramentos. Tamén indicou que "a inmensa maioría dos tanatorios son privados, e só nalgúns casos, concretamente en municipios moi pequenos nos que non había unha instalación deste tipo se decidiron a construír un e sacalo a concesión. Ponte Caldelas non estaba nesta situación porque a iniciativa privada xa instalara un e non tería ningún sentido que o Concello, pola súa conta, construíse outro porque polo número de habitantes do que dispoñemos non sería necesario. Por iso pedimos que aclaren dunha vez se o pretenden reabrir ou non, porque se non queren facelo hai outras empresas interesadas en adquirilo. O que non tería sentido é que se construísen máis".
"Imposible que o concello asuma supostas débedas entre empresas"
Rodríguez reiterou categoricamente que "como alcalde non vou entrar nas supostas débedas que teñan entre elas as empresas copropietarias do tanatorio (Alianza y Barros e Albia Gestión de Servicios) porque loxicamente é unha cuestión eminentemente privada. O que me queda claro é a forma de actuar de cada unha delas. Os clientes da compañía deben tomar boa nota desta forma de comportarse", sinalou o alcalde de Ponte Caldelas.
Así mesmo, en referencia a unha reunión celebrada na Casa do concello a instancias do alcalde para solucionar o problema que afecta a tantos veciños do municipio, o alcalde aclarou que "o xerente de Alianza y Barros non di toda a verdade. ÿ certo que tivemos unha reunión en verán e falamos deste asunto e que en principio quedamos en "manter un contacto máis frecuente" para informarme de como ía evolucionando a situación. Pero tamén é certo que dende esa reunión esa persoa nin se puxo ao teléfono nin contestou ás numerosas veces que intentei falar con el nos últimos meses para pedirlle algunha información. Esa falta de delicadeza, de nin sequera responder ás chamadas, déixame clara a súa forma de actuar", criticou Perfecto Rodríguez.
Resposta ao Psoe: "isto non é Venezuela, aquí non se poden expropiar propiedades privadas sen máis"
Finalmente, o alcalde quixo responder ás últimas declaracións do voceiro socialista na Corporación, Andrés Díaz, respecto á súa proposta de compralo ou expropialo, cualificándoa de "idea absurda e fóra de toda realidade" porque non se pode comprar porque non queren vender e se quixesen vender, me consta que hai empresas funerarias interesadas en adquirilo. Respecto á posibilidade de expropiación non ten sentido porque non é unha competencia municipal, salvo que Andrés Díaz crea que estamos en Venezuela e se poden expropiar as propiedades privadas sen máis" concluíu Perfecto Rodríguez.
Relacionadas:
-
Acordo para a reapertura do tanatorio de Ponte Caldelas
Por Redacción |
-
Unha empresa funeraria estuda construír un tanatorio no ámbito da zona urbana de Ponte Caldelas
Por Redacción |
-
O PSOE de Ponte Caldelas sinala ao alcalde como "máximo responsable de que os veciños non teñan onde velar os seus defuntos"
Por Redacción |
-
Alianza y Barros suxire ao alcalde de Ponte Caldelas que faga municipal o servizo de tanatorio
Por Redacción |
-
O PSOE de Ponte Caldelas comprométese a reabrir o tanatorio
Por Redacción |
-
Perfecto Rodríguez lamenta o "desprezo" aos veciños por parte das empresas que manteñen pechado o tanatorio
Por Oskar Viéitez |