Denuncian baixadas salariais no Rexistro da Propiedade número 2 para despedir máis "barato"
Por Redacción
A Federación de Servizos da UGT denunciou na mañá deste xoves 8 que un dos seis empregados do Rexistro da Propiedade número 2 de Pontevedra foi despedido despois de ver rebaixado o seu soldo á metade baixo a promesa de que con esta medida se ían manter todos os postos de traballo.
Isaac Gutiérrez, secretario xeral da Federación de Servizos UGT Pontevedra e Hugo Sánchez, secretario sectorial de Oficinas e Despachos FeS Galicia afirman que baixo esta práctica a titular deste Rexistro da Propiedade se asegura unha rebaixa na indemnización do traballador en caso de que o despedimento sexa declarado improcedente. Os responsables deste sindicato demandan da administración e, en concreto, á responsable deste rexistro que normalice as relacións laborais e que se aplique o convenio do sector. Denuncian que os rexistros funcionan como PEME nas que se fomenta o individualismo no momento de negociar os salarios.
No caso do traballador despedido indican que se lle rebaixou o soldo de 1.270 euros en 180 euros mensuais en outubro de 2012 e en setembro de 2013 se lle reduciu noutros 500 euros máis. Ademais, dende UGT, afirman que só se lle aplicou unha subida de 800 euros cando a lei establecía unha de 1.200 euros. Sinalan que non houbo redución da xornada laboral e apenas se produciu unha baixada de volume de traballo.
Dende o sindicato apuntan que hai unha tendencia por parte dos titulares destes organismos dependentes da Administración a usar a reforma laboral para o seu propio beneficio e a realizar prácticas "feudais". O traballador, despedido hai sete meses, está pendente do xuízo por despedimento.