Os 16 detidos por un alixo de 1,5 toneladas de cocaína declararán o xoves no Xulgado de Cambados
Por Redacción
A operación contra o narcotráfico desenvolvida en relación coa aprehensión dun barco con 1,5 toneladas de cocaína leva acumuladas xa polo menos 16 detencións e os arrestados empezarán a ser postos este xoves a disposición do Xulgado de Instrución número 3 de Cambados.
O Tribunal Superior de Xustiza de Galicia (TSXG) indicou que o caso segue baixo segredo de sumario, pero outras fontes da investigación indicaron que os pasos a disposición xudicial comezarán este xoves, mentres o barco 'Coral I' no que se localizou a droga viaxa rumbo ao porto de Vigo custodiado polo buque Petrel do Servizo de Vixilancia Aduaneira (SVA), o mesmo que o abordou en alta mar nos últimos días.
Nove dos detidos ata o momento foron arrestados a bordo da 'Coral I', un buque pesqueiro de bandeira venezolana no que o Grupo de Resposta Especial para o Crime Organizado (GRECO) e do SVA localizaron o alixo de 49 fardos de cocaína. O resto 'caeron' en terra na bisbarra do Salnés.
A suposta rede de narcotraficantes desarticulada nesta operación estaba presuntamente liderada polo coñecido narcotraficante Rafael Bugallo Piñeiro, co alcume O Mulo, que tiña en vigor unha orde de busca e captura tras terse ausentando do centro penitenciario no que cumpría condena por un delito relacionado co tráfico de drogas. Saíu de permiso e non regresou.
Xunto a el foi detido Juan Carlos N.O., un empresario de Vilanova de Arousa, varios colombianos que residían en Vilagarcía e a totalidade da tripulación do barco.
As investigacións remóntanse a tempo atrás, segundo fontes próximas ao caso, e derivaron o pasado luns coa abordaxe do barco Coral I, de bandeira venezolana, interceptado en pleno Atlántico a oitenta millas ao oeste de Cabo Verde. Os nove tripulantes do buque foron detidos. Portaban tonelada e media de cocaína, cun valor no mercado próximo aos 150 millóns de euros.
A partir de aí, comezou toda a actividade policial en terra. Durante este martes, día de Reis, sucedéronse os rexistros en diferentes domicilios da bisbarra do Salnés. Comezaron xa sobre as seis da mañá. Puntos como Cambados, Vilanova de Arousa ou Vilagarcía de Arousa foron os escenarios dun grande despregamento policial, para comprobar a relación de diferentes persoas co alixo incautado.