Golpe ao narcotráfico no Salnés: unha quincena de detidos e 1.500 quilos de cocaína incautados
Por Redacción
Unha operación contra o narcotráfico, iniciado coa aprehensión dun barco en alta mar con 1.500 quilos de cocaína a bordo, permitiu a detención dunha quincena de persoas, entre elas, un dos históricos narcotraficantes do Salnés, Rafael Bugallo Piñeiro, alcumado O Mulo. Xunto a el foi detido Juan Carlos N.O., un empresario de Vilanova de Arousa, varios colombianos que residían en Vilagarcía e a totalidade da tripulación do barco.
Este operativo especial, desenvolvido polos Grupos de Resposta Especial para o Crime Organizado (GRECO) de Galicia en colaboración co Servizo de Vixilancia Aduaneira (SVA), está dirixido polo Xulgado de Instrución número 3 de Cambados, que decretou o segredo do sumario. Continúa aberto , polo que non se descartan novas detencións nas próximas horas.
As investigacións remóntanse a tempo atrás, segundo fontes próximas ao caso, e derivaron o pasado luns coa abordaxe do barco Coral I, de bandeira venezolana, interceptado en pleno Atlántico a oitenta millas ao oeste de Cabo Verde. Os nove tripulantes do buque foron detidos. Portaban tonelada e media de cocaína, cun valor no mercado próximo aos 150 millóns de euros. Está a ser escoltada ata Galicia, a onde chegará nunha semana.
A partir de aí, comezou toda a actividade policial en terra. Durante este martes, día de Reyes, sucedéronse os rexistros en diferentes domicilios da comarca do Salnés. Comezaron xa sobre as seis da mañá. Puntos como Cambados, Vilanova de Arousa ou Vilagarcía de Arousa foron os escenarios dun gran despregamento policial, para comprobar a relación de diferentes persoas co alixo incautado.
Entre eles, destaca o realizado na parroquia de Corvillón (Cambados), concretamente na residencia familiar de Rafael Bugallo Piñeiro 'O Mulo', un vello coñecido da policía dende que, nos anos 90, pilotaba planeadoras para capos como Sito Miñanco e Manuel Charlín. A súa última detención remóntase a 2008 pola súa relación cun frustrado desembarco de catro toneladas de cocaína en Arousa e que finalizou cunha planeadora queimada na praia da Lanzada. Foi detido despois dun exhaustivo rexistro na súa propiedade.
Ademais, os axentes rexistraron a vivenda do empresario Juan Carlos N.O., de 43 anos, en Vilanova de Arousa e en dous pisos nas rúas Rodrigo de Mendoza e Agustín Romero. Nesta última detiveron varias persoas de nacionalidade colombiana.
Os detidos pasarán a disposición xudicial nos próximos días.
Relacionadas:
-
O fiscal solicita unha pena de 24 anos de prisión para 'O Mulo' polo alixo de cocaína do Coral I
Por Diego Espiño |
-
Así foi a espectacular abordaxe do Coral I, o barco con 1.500 quilos de cocaína destinados a O Salnés
Por Redacción |
-
Un cambadés, entre os once detidos dun grupo de narcos que planeaba o secuestro dun empresario
Por Redacción | Creada e actualizada
-
Ingresan en prisión oito dos detidos na última operación contra o narcotráfico en Cambados
Por Redacción |
-
Os 16 detidos por un alixo de 1,5 toneladas de cocaína declararán o xoves no Xulgado de Cambados
Por Redacción |
-
Os GRECO realizan rexistros na zona do Salnés tras interceptar un barco con cocaína
Por Redacción |