O coro do campus xa alza a súa voz
Por Redacción
Algúns xa contaban con experiencia no mundo da música vocal, outros e outras eran simplemente afeccionados á música, pero había tamén quen non vira diante unha partitura. Mais todos eles integran un mesmo grupo, o primeiro coro do campus de Pontevedra.
Baixo a dirección do profesor da Facultade de Ciencias da Educación e do Deporte Marco Lucato, as preto de 20 persoas que integran esta agrupación veñen traballando nas últimas semanas na ensamblaxe das súas voces e na posta a punto dun primeiro repertorio, coa idea de poder realizar o seu concerto de presentación nos primeiros meses de 2015.
"Aínda estamos nos comezos, pero estamos moi contentos por como están indo as cousas", recoñece o director.
O coro está aberto en todo momento a calquera persoa que queira sumarse. Para entrar a formar parte do mesmo non hai que pedir cita nin pasar ningunha proba, basta con poñerse en contacto coa Vicerreitoría do campus ou ben pasarse directamente polos ensaios, que se desenvolven os martes e xoves de 18.30 a 20.30 horas na aula 3 de Ciencias da Educación e do Deporte.